Бүгүн, 15-мартта Ош шаарынын мэриясынын Тышкы байланыштар жана аналитика башкармалыгынын өкүлдөрү Таллин шаарынын (Эстония) Электрондук башкаруу академиясынын эксперттери менен онлайн видеоконференция өткөрүштү.

Жыйындын жүрүшүндө башкармалыктын башчысы Мирлан Исраилов жана Электрондук башкаруу академиясынын директору Арво Отт муниципалдык кызматтарды санариптештирүү жаатында ишке ашырылып жаткан долбоорлор боюнча маалымат бөлүштү.

Тактап айтканда, М.Исраилов Ош шаарынын муниципалдык кызматтарын санариптештирүү системасын өнүктүрүү боюнча негизги иш-чараларга жана пландарга токтолуп, бул багытта эки тараптуу кызматташууну бекемдөөнү сунуштады.

Эстониялык эксперттер калкка мамлекеттик жана муниципалдык кызматтарды көрсөтүүдө санариптик технологияларды киргизүү боюнча өздөрүнүн ийгиликтүү тажрыйбасы менен тааныштырышты.

Ошондой эле бул жаатта эксперттик жардам көрсөтүүгө даяр экендиктерин билдиришти.

Жолугушуунун жыйынтыгында санариптик көндүмдөрдү өнүктүрүү, муниципалдык кызмат көрсөтүүлөрдүн жеткиликтүүлүгүн кеңейтүү, жарандардын жеке маалыматтарынын купуялуулугун сактоону күчөтүү, киберкоопсуздукту жакшыртуу боюнча консультативдик-эксперттик жардам көрсөтүү максатында Ош шаарына эстониялык адистердин келиши жөнүндө макулдашууга жетишилди.

Бүгүн, 15-мартта Ош шаарынын борбордук аянтында Өзгөчө кырдаалдар министрлигинин Ош шаары боюнча башкармалыгына жаңы өрт өчүрүүчү атайын техникаларды жана керектүү жабдыктарды тапшыруу иш-чарасы болуп өттү.

Мэр Бакытбек Жетигенов өз сөзүндө ӨКМдин техникалык потенциалын көтөрүү менен калктын коопсуздугуна мамлекеттик деңгээлде көңүл бурулуп жатканын белгиледи.

“Биз үчүн шаар тургундарынын жана конокторунун коопсуздугу биринчи орунда турат. Азыркы учурда табигый жана техногендик мүнөздөгү өзгөчө кырдаалдар менен күрөшүүдө заманбап техникалардын болуусу, адам өмүрүн, материалдык баалуулуктарын сактоодо, өрт кырсыктарын жоюуда куткаруучулардын ишин жеңилдетет. Бул заманбап техникалардын өзгөчөлүгү анын жүк көтөрүмдүүлүгүндө, кыймылдаткычынын күчтүүлүгүндө жана ылдамдыгынын тездигинде”, - деп баса белгиледи мэр.

ӨКМдин Ош шаары боюнча башкармалыгы жалпы 10 даана HOWO үлгүсүндөгү ар кандай шарттагы өрттөрдү өчүрүүгө, авариялык куткаруу иштерин жоюуга ылайыкталган техникалар менен камсыздалды.

Анын ичинде 54 метр бийиктикке жете турган тепкич да бар.