Бүгүн, 20-апрелде Ош шаарынын вице-мэри Сонунбек Жунусбаев “Ош-Тазалык”, “Ошсууканал” ишканаларынын жана Оштогу көрктөндүрүү жана жашылдандыруу чарба комбинатынын жетекчилери менен кеңешме өткөрдү.  

Жыйындын жүрүшүндө КР Өзгөчө кырдаалдар министрлиги тарабынан аба ырайы тууралуу жарыяланган эскертүүгө байланыштуу инженердик тармактардын күчөтүлгөн режимин уюштуруу маселеси каралды. Тактап айтканда, жумушчу бригадалардын күнү-түнү нөөмөт иштерин уюштуруу, ошондой эле канал тармактарынын, ирригациялык системалардын тазалыгын, суу түтүктөрүнүн абалын көзөмөлдөө боюнча атайын тапшырма берилди. Аба ырайынын начарлашы жарыяланганына байланыштуу жарандардын кайрылууларына өзгөчө көңүл буруу тапшырылды.

Бүгүн, 20-апрелде Ош шаарынын мэриясында Корея эл аралык кызматташтык агенттигинин программалык координаторлорунун өкүлдөрү менен жолугушуу болуп өттү. Жыйынга вице-мэр Венера Рыскулова, мэриянын кызматкерлери, тиешелүү кызматтардын, мекемелердин жетекчилери жана адистери катышты. 

Жолугушуунун жүрүшүндө Кыргыз Республикасында келечектүү багыттар боюнча ишке ашырылып жаткан аталган агенттиктин долбоорлорунун бет ачары болуп өттү, анын ичинде айыл чарбаны колдоо, компьютердик билим берүү, социалдык камсыздоо, медайымдык иш, туризм, китепканачылык, жалпы менеджмент, инфраструктураны өнүктүрүү, коопсуздук жана башкалар кирет.  

Жыйында айрым долбоорлорду ишке ашырууга арыздар түшкөн учурда маселени иликтөөгө тиешелүү адистер жөнөтүлүп, ар бир облустагы абал менен жеринде таанышып чыгаары айтылды. 

Жолугушуунун жыйынтыгында эки тараптуу кызматташтыкты жакшыртуу жана өнүктүрүү боюнча макулдашууга жетишилди.

Ош шаарынын мэри Алмаз Мамбетовдун тапшырмасы менен кечээ, 19-апрелде калаанын биринчи вице-мэри Марс Исаев баштаган делегация Өзбекстандын Андижан облусуна иш сапары менен барды. Иш сапар 2022-2023-жылдарга Ош шаары менен Андижан облусунун ортосундагы кызматташтыкты мындан ары тереңдетүү жана кеңейтүү боюнча “Жол картасынын” 2.4. пунктун аткаруу максатын көздөйт.