Ардактуу замандаштар!
Кадырлуу коноктор!

Жалпыңыздарды кирип келген жаңы жылыңыздар менен Ош шаарынын мэриясынын жана жеке өзүмдүн атымдан чын дилимден куттуктайм!

Өтүп бараткан жыл улутубуздун уңгусун бекемдөөгө, элибиздин көөнөргүс дөөлөттөрүн арттырууга, журтубуздун руханий баалуулуктарын өркүндөтүүгө, эң негизгиси мамлекетибиздин өсүп-өнүгүүсүнө багытталган жемиштүү, аракетке бай, үзүрлүү эмгектердин жылы болду десем жаңылышпайм.

Эски жылды узатып, жаңы жылды тосуп жатып, ар бир инсан жыл ичинде жасаган эмгегин көз алдынан өткөрүп, өзүнө-өзү баа берип, ийгилигине кубанып, жаңы жылга жаңы максат, тилектерин алдыга коюп бекемдейт.

Мен да Ош шаарынын мэри катары жаңырган жылга шаардын өнүгүүсүнө, элибиздин турмуш шартын жакшыртууга багытталган максаттарды, тилектерди өз алдыма коюп жатам. Сиздердин колдооңуздарга таянып, келээрки жылдарда ишке ашыруучу көптөгөн масштабдуу долбоорлорду аткарууга ниеттерим бар. Ошол максаттарга жетүү үчүн сиздер менен биргеликте чечкиндүү иштерди улантып, өзүбүздүн бүтүндөй күч аракеттерибизди жумшап, адал эмгектерибиз аркылуу шаарыбыздын келечегине өз салымыбызды кошолу.

Урматтуу шаардыктар!
Кадырлуу коноктор!

Жаңы 2023-жылда ар бириңиздер бекем ден-соолукта болуп, үй-бүлөңүздөрдү ырыскы береке ыроолоп, бакубат жашоо коштосун!

Сүйүктүү шаарыбызда бактылуу инсандар жашап, тынчтык өкүм сүрүп, өнүгүү орун алып, бейпил жашооңуздарга тилектешмин. Жаратканыбыз элибизге кут-береке, жергебизге оомат берсин!

Жаңы жылыңыздар менен!

Бакытбек Жетигенов,
Ош шаарынын мэри.

#Ош_мэрия
#Бакытбек_Жетигенов