Версия для печати
Суббота, 05 Октябрь 2019 16:55

Ош шаарынын Кулатов кичи шаарчасында жаңы сейил бак пайдаланууга берилди

Бүгүн, 5-октябрь - Ош шаарынын күнүнө карата өткөрүлгөн шаардагы Т.Кулатов кичи шаарчасында жаңыдан негизделип курулган «Ак Ниет» сейил багы пайдаланууга берилди.

Сейил бактын расмий ачылышына премьер-министр Мухаммедкалый Абылгазиев, Ош шаарынын мэри Таалайбек Сарыбашов, Өкмөттүн Ош облусундагы ыйгарым укуктуу өкүлү Узарбек Жылкыбаев, шаардык кеңештин төрагасы Жапарбек Ормонов, дипломатиялык корпустардын өкүлдөрү жана жергиликтүү тургундар катышты.

Өкмөт башчы М.Абылгазиев шаар тургундарын Ош шаарынын күнү жана жаңы сейил бактын ачылышы менен куттуктап, биримдик, ынтымак каалады.

Ал эми, Ош шаарынын мэри Т.Сарыбашов аталган сейил бактын курулушу тууралуу маалымат берди.

- “Ак Ниет” сейил багынын жалпы узундугу 850 метр, туурасы 18-20 метрди түзөт. Курулушка жергиликтүү бюджеттен 28 млн сом бөлүнгөн. Курулуш иштери ушул жылдын июнь айында башталган эле. Бул жерде шаардыктар жана меймандардын эс алуусу үчүн бардык шарттар түзүлгөн. Келечекте сейил бакты Ак-Тилек жана Жапалак кичи райондоруна чейин кеңейтүүнү пландап жатабыз. Ак ниет менен курулушун баштаган сейил бакка "Ак Ниет" деп ат бердик. Шаарыбызда жакшылыктар көп болсун”,-деди шаар мэри.

Андан соң , расмий коноктор жергиликтүү аксакалдар менен биргеликте жаңы курулган «Ак Ниет» сейил багынын кирүүсүндө тартылган кызыл тасманы кесишти.

 

 

 

 

Окулду 94 жолу

Билдирүү кошуу


Сыр сөз
Жаңылоо